聖誕前，我做了一個大型牙科手術，剝牙、種牙．．．幾隻大牙！
對於我這個最怕行入牙醫診所的人來說，我簡直覺得自己好勇敢！
我以為自己是超人，唔駛休息，但呢次真係好攰，可能係儲埋2015年的攰，加上牙肉傷口好痛，唔食得嘢，成個假期都喺屋企休息。
休息期間，唯一娛樂，就係喺屋企睇戲，同埋出街睇戲。
睇咗好多套戲，其中有兩套，兩套都係講女人故事的戲，改編自真人真事，好想同大家分享下。
一套係舊戲，Woman in Gold，女主角係一個幾十歲奧地利女人，為家族的公義和爺爺的遺產，特別是一幅當年納綷黨沒收，但其後在奧地利國家博物館的名畫，她要打官司的對象是奧地利政府。作為一個市民，如果政府奪去你的私人財產，而現存的法律和體制都沒有有利於她爭取的先例，甚至相關的法律根本沒有這方面的保障，試想像要發動這場鬥爭，是多麼的艱巨。
我看這戲的時候，頭十分鐘差點想「換碟」，好像很悶，更是「沒希望」和「無得鬥」的感覺，但看下去，我覺得這戲很好看。
有時，好多野，到你真係要頂硬上為一班人去爭取時，總係要積極面對，無畏無懼，因為懼都無用。
個故事架構OK，但最好睇既，係寫情既部份，寫親情，寫人與人之間的支持，睇完成個人好似有返啲力量，導演Simon Curtis和演員Helen Mirren既功力都好好。
套戲仲有一個好觸動我既地方，就係每個人都有一些回憶，因為係好好既回憶，到失去後，反而想逃避面對。女主角小時候在奧地利長大，因為戰爭，以前充滿親情回憶的大屋，今日已經變成政府辦公室，佢為打官司回去，每一幕回憶戲都拍得很有感情，令人觸動。
戲中有位律師，原籍奧地利，在美國當律師。他幫女主角打這場官司，因為在奧地利「無得打」，嘗試將case搬到美國，成功令美國法庭受理案件，對手是奧地利政府，最後更打贏官司，取回名畫，這單case，成為轟動全世界的重要案例，這一段也拍得很好看。
另一套戲，都係女人故事，Joy「歡姐當自強」。入場是因為女兒喜歡Jennifer Lawrence，而我以前超鍾意Isabella Rosellini，嘩，當年佢真係靚到dum一聲！故事本身我覺得組織得普通，可以更好，但係Joy個角色本身好討好：一個女人，天生有個耳仔軟既老豆，皇后病的阿媽，一個長唔大無大志既前夫，一個成事不足敗事有餘的負皮繼姐，兩個有排都未長大的bb，只有一個年老婆婆永遠信任同支持自己．．．這些看似好平常，但又係纏繞一世的人生不幸泉源，好多人每日都面對，問題係，你會唔會仍然去擔起責任，無論點都包容同照顧佢地。
這兩套戲寫親情都寫得很好：一個人係屋企核心，對內對外都承受無盡壓力，必要時就要出來撐，撐得成功了，以後還是靠你去繼續撐！但這就是很多人不斷努力的動力，或者，這就是上天要你孭的責任！
講返我好鍾意既Isabella Rosellini，佢一直都好靚，老左都aged gracefully，在戲中飾演羅拔迪尼路的女友，不再是美女角色，亦演得很好。
年月的確是女人最大的敵人，當我告訴女兒，今年63歲的Isabella Rosellini曾經是我眼中最美麗的女人，她無法置信，直至我給她看舊照片．．．
女人要盡keep，我終於明白，所以今後我看見女士們花多些金錢和時間來扮靚，我都會支持！
2016，希望大家都開開心心，遇強愈強，女士們個個都靚！
（網上圖片）
Search